Skólaumbætur í deiglu

Málþing um starf og verkefni skólarannsókna- og skólaþróunardeildar menntamálaráðuneytisins 

í Veröld – húsi Vigdísar, laugardaginn 12. maí 2018, kl. 13.00-17.00


Málþinginu er ætlað að varpa ljósi á áhrif skólarannsókna- og skólaþróunardeildar menntamálaráðuneytisins 1966-1996 á skólastarf og skólaþróun í landinu. Skólarannsóknadeildin var sett á laggirnar 1966 (hét fyrst Skólarannsóknir, þá Skólarannsóknadeild og síðar Skólaþróunardeild). Hún fékk fljótlega það verkefni að annast heildarendurskoðun náms og kennslu í grunnskólum og var þetta verkefni eitt umfangsmesta skólaþróunarverkefni sem í hefur verið ráðist hér á landi. Fjöldi sérfræðinga kom að starfinu, námstjórar, námsefnishöfundar og ráðgjafar. Auk námsefnisgerðar unnu starfsmenn að námskrárgerð, viðamikilli endurmenntun í samstarfi við Kennaraháskólann og útgáfu handbóka og leiðbeininga, auk þess að heimsækja skóla til ráðgjafar og eftirlits. Talsverðar deilur urðu þegar á leið um sumt í þessu starfi, t.d. um námsefni í samfélagsgreinum.

Margir þeirra sem að þessu starfi komu eru enn á lífi, en flestir komnir á eftirlaunaaldur. Eitt af markmiðum ráðstefnunnar er að fá fram viðhorf sem flestra þeirra til þessa starfs og munu sex fyrrverandi starfsmenn, sem allir gegndu stöðu námstjóra, horfa til baka í stuttum erindum: Aðalheiður Auðunsdóttir (heimilisfræði), Anna Kristjánsdóttir (stærðfræði), Sigurður Pálsson (kristin fræði og trúnarbragðafræði), Sigþór Magnússon (samfélagsfræði), Þorvaldur Örn Árnason (náttúrufræði) og Þórleif Drífa Jónsdóttir (mynd- og handmennt).

Þrír fræðimenn, sem þekkja vel þetta tímabil í íslenskri skólasögu, hafa tekið að sér að varpa ljósi á starf, stefnur, strauma og áhrif deildarinnar, auk þess sem efnt verður til pallborðsumræðna með þátttöku fræðimanna og fyrrverandi starfsmanna deildanna. Erindin flytja Helgi Skúli Kjartansson sagnfræðingur og menntunarfræðingarnir Gerður G. Óskarsdóttir og Jón Torfi Jónasson. Pallborðsumræðunum stýrir Ingólfur Ásgeir Jóhannesson prófessor sem einnig hefur rannsakað starf skólarannsóknadeildar. Sjá nánar um aðalerindin og umræðurnar hér.

Dagskrá

Ráðstefnustjóri verður Ólafur Helgi Jóhannsson.

Að málþinginu stendur hópur fyrrverandi starfsmanna í samstarfi við Rannsóknarstofu um þróun skólastarfs.

Mennta- og menningarmálaráðuneytið styrkir ráðstefnuna!

Leave a Reply